Testo Kis Dour Mein Insaf - Masood Rana
Testo della canzone Kis Dour Mein Insaf (Masood Rana), tratta dall'album Shirin Farhad (Original Motion Picture Soundtrack)
گالوں پہ مہکتے ہیں گلاب آج حیا سے
آنے کو ہے ملنے کوئی اس ماہ لقا سے
چہرہ ہے کہ ہنستا ہوا ایک پھول کھلا ہے
شیریں کو وفاؤں کا صلہ آج ملا ہے
اب دامنِ فرہاد بہت دور نہیں ہے
پر لگتا ہے، قسمت کو یہ منظور نہیں ہے
وہ دیکھو، بچھا دام...
وہ دیکھو، بچھا دامِ ہوس پیار کے پیچھے
صیاد چھپا بیٹھا تھا گلزار کے پیچھے
آئی جو دبے پاؤں، دغا دے گئی دنیا
اک پھول کو گلشن سے اڑا لے گئی دنیا
باز آئیں گے کب اہلِ جفا اپنی جفا سے
کس دور میں انصاف ہوا اہلِ وفا سے
وہ سن سے لگا تیر کسی کی رہِ جاں میں
اک حشر سا برپا ہے دلِ کون و مکاں میں
چکرا کے گرا عاشقِ ناشاد زمیں پر
تقدیر کی تحریر ابھر آئی جبیں پر
صحرا میں جسے آن ملی شامِ جدائی
دیتا ہے وہ ڈھلتے ہوئے سورج کی دہائی
آنچل کی ہوا ہے نہ یہاں زلف کے سائے
قسمت کسی دشمن کو بھی یہ دن نہ دکھائے
ٹوٹے ہوئے دل حشر میں پوچھیں گے خدا سے
کس دور میں انصاف ہوا اہلِ وفا سے
یہ ظلم کے پہرے میں ملاقات کسی کی
ہونٹوں پہ رکی رہ گئی ہر بات کسی کی
فریاد کیے جاتی ہیں خاموش نگاہیں
عاشق کے نصیبوں میں کچھ آنسو ہیں، کچھ آہیں
دل والوں کا غم خوار فلک ہے نہ زمیں ہے
تسکین کہیں ان کے مقدر میں نہیں ہے
اک خواب دکھا کر انھیں بہلایا گیا ہے
منزل پہ بھی لا کر انھیں ترسایا گیا ہے
یہ لوگ تو دریا پہ بھی رکھے گئے پیاسے
کس دور میں انصاف ہوا اہلِ وفا سے
لو آج کوئی یار کی محفل سے چلا ہے
کچھ وہ ہی سمجھتا ہے کہ کس دل سے چلا ہے
کانٹے بھی جہاں اس کو نظر آئے تھے کلیاں
اب چھوڑ چلا ہے وہی محبوب کی گلیاں
حسرت کی نظر سے در و دیوار کو دیکھے
جیسے کوئی اجڑے ہوئے گلزار کو دیکھے
چمکا نہ کبھی اس کے مقدر کا ستارا
صیاد نے لے کر لبِ شیریں کا سہارا
فرہاد کا دل توڑ دیا سنگِ جفا سے
کس دور میں انصاف ہوا اہلِ وفا سے
Credits
Writer(s): Qateel Shifai
Lyrics powered by www.musixmatch.com
Link
Disclaimer:
i testi sono forniti da Musixmatch.
Per richieste di variazioni o rimozioni è possibile contattare
direttamente Musixmatch nel caso tu sia
un artista o
un publisher.